கோடை விடுமுறை

 கோடை விடுமுறைக்கு இந்த வருடம் குழந்தைகள் மற்றும் என்னுடைய பள்ளி நண்பர்களின் குடும்பத்துடன் ஆனைமலை Top View, பரம்பிக்குளம், வால்ப்பாறை, குரங்கு அருவி என்று கடந்த மூன்று நாட்களாக இயற்கை எழிலை குழந்தைகள் முதல் பெரியவர்கள் வரை கொண்டாடித் தீர்த்து விட்டோம். இது ஒரு அருமையான சுற்றுலா என்று சொன்னால் மிகையாகாது. இதை ஏற்பாடு செய்த அனைத்து நண்பர்களுக்கும் மிக்க நன்றி. வாழ்க்கை ஓட்டத்தில் அப்பப்ப இந்த இளைப்பாரல் குடும்பத்துடன், நண்பர்களுடன் தேவை .அதை இந்தச் சுற்றுலா பூர்த்தி செய்து விட்டது.இன்று காலை என் குழந்தை இன்னோரு முறை செல்ல வேண்டும் என்கிற சொல் ஒன்றே போதும். நாம் நம் குழந்தைக்கு தந்த மகிழ்ச்சி விருந்தின் எல்லையை என்னால் உணர முடிந்தது. நம் காலத்தில் இத்தகைய மகிழ்ச்சி விருந்து தாத்தா, பாட்டி ஊருக்குச் சென்றாலே அமைந்து விடும். இன்றோ குழந்தைகள் படிப்பு என்ற பெயரில் நம்மளே விட அதிக மன உளச்சலுக்கு ஆளாகின்றனர். அவர்களுக்கு இத்தகைய சுற்றுலா நிச்சயம் தேவை. உங்கள் குழந்தைகளையும் உங்களால் முடிந்த இடத்திற்கு அழைத்துச் சென்று மகிழ்ச்சியில் திகைக்கச் செய்யுங்கள்.

அடிபம்பு

 நான் பிறந்து வளர்ந்த கிராமத்தில் ஒரு 80 களின் இறுதியில் இத்தகைய அடிபம்புகளை எனது கிராமத்தில் முதல் முறையாக மக்களின் தண்ணீர் பிரச்சனைக்காக அமைத்துக் கொடுத்தனர். இத்தகைய அடிபம்பில் அடிக்கும் தண்ணீர் தான் எங்கள் கிராமத்து மக்களின் குடிநீர்க்கும், வீட்டுத் தேவைக்கும் பயன்படுத்துவார்கள். இதில் எனது அம்மா அடிபம்பில் தண்ணீர் அடிக்கப் போகும் போதும் எங்களையும் அழைத்துச் செல்வார். நானும், எனது அண்ணன் மற்றும் தங்கை போட்டிப் போட்டு சும்மா குதித்துக் குதித்து அடிப்போம். அதில் வயதானவருக்கு முடியாதவர்களுக்கு என்று உதவிகள் பல செய்யும் பண்புகளும் கற்கப்பட்ட இடம் என்றால் மிகையாகது.காலப் போக்கில் ஒவ்வொரு வீட்டிலும் போர்வல் மூலம் போர் போட்டு இயந்திர மோட்டார் மூலம் நீர் எடுக்கும் நிலை வந்தது. இன்று அதையும் தாண்டி கிராமத்தில் எல்லாம் ஒரு குடம் மினரல் வாட்டர் பத்து ரூபாய்க்கு விற்கப்படும் நிலையைப் பார்க்கும் போது மனத்திற்கு வேதனை தான். எத்தகைய இயற்க்கைச் சூழலில் வாழ்ந்த நம்மை குடிக்கும் தண்ணீரைக் கூட காசு கொடுத்து வாங்கும் நிலைக்கு ஒவ்வொருவரும் தள்ளப்பட்டிருக்கிறோம். இது எவ்வாறு நடந்தது, மினரல் வாட்டர் தான் நல்ல நீர் என்று எப்படி நம் மீது திணிக்கப்பட்டது. ஏன் காலம் காலமாய் குளத்திலும், கிணற்றிலும், அடிபம்பிலும் அடித்துக் குடித்த நாம் மாறக் காரணம் தான் என்ன? ஒரு சில ஆய்வு முடிவுகள் மினரல் வாட்டரால் கேன்சர் வரும் அபாயம் இருக்கிறது என்கிறார்கள். நம் வீட்டில் அடிபம்பில், கிணற்றில் இருந்து தண்ணீர் பிடிப்பதற்கு முன்பு நமது அம்மா மார்கள் நன்கு குடத்தையோ, பானையையோ கழுவிப் பிடித்தார்கள். இந்த வாட்டர் கேன்களில் வீட்டிற்குத் தரப்படும் தண்ணீர் அவ்வாறு சுத்தம் செய்யப் படுகிறதா என்றால் இல்லை என்று தான் சொல்ல வேண்டும். தினமும் இயற்கை முறையில் தண்ணீர் பிடித்த நம்மை ஒரு மாதம் வரை சில சமயம் கேன் வாட்டரை வைத்துப் பயன்படுத்தும் ஒரு சிலரை எண்ணும் போது வேதனை தான் வருகிறது நாகரிகத்தின் வளர்ச்சியில் நாம் இழந்தது பழைய நினைவுகளை மட்டுமல்ல நம்மை அறியாமல் தினம் தினம் பருகும் மினரல் வாட்டர், சுவாசிக்கும் காற்றும், வித விதமாய் வரும் நோயும் தான் நாம் பெற்றது. இதற்குத் தீர்வுதான் என்ன? மனிதனுக்குத் தேவையான உணவு, காற்று, குடிநீர் போன்ற எந்த தேவையையும் நாம் இயற்கையிலிருந்து பெற்றுக்கொள்ள முடியும். ஆனால் இயற்கைக்கு எதிராக நாம் செயல்பட ஆரம்பித்ததன் விளைவாக, அவற்றைப் பணம் கொடுத்து வாங்கவேண்டிய அவலநிலைக்கு தள்ளப்பட்டு விட்டோம். வீட்டுக்கு வருபவர்களுக்கு, முதலில் தண்ணீர் கொடுத்து வரவேற்பது நம் தமிழர் மரபு. ஆனால், இன்றைக்கு அந்தத் தண்ணீரே தரமில்லாததாக இருந்தால் என்ன செய்வது? தண்ணீர்... நமக்கும், நம்மைச் சேர்ந்தவர்களுக்கும் நோயை ஏற்படுத்தும் ஒரு காரணியாக மாற நாம் அனுமதிக்கக்கூடாது. மேலும், நாம் வாங்கும் கேன் தண்ணீர் தரமானதுதானா? என்று கண்டிப்பாகத் தெரிந்துகொள்ள வேண்டும். அதற்கான குறைந்தபட்ச முயற்சியையாவது எடுக்கவேண்டும். இல்லையேல் நாம் குடிக்கும் நீர் நம் உயிருக்கு உலை வைக்கும்.

நாம் நமது பெற்றோரை விட அதிகமாக சம்பாதிப்பது

 

நாம் நமது பெற்றோரை விட அதிகமாக சம்பாதிப்பது எளிது. அவர்களை விட எளிமையாக வாழ்வது தான் கடினம். மிகச் சிலர் வசதியிருந்தும் எளிமையாக வாழ்வதுண்டு. அதில் நானும் ஒருவன் என்பதில் எனக்கு மகிழ்ச்சியே. சிறு வயதில் இருந்து அத்தகைய பழக்கத்தை என் தாய், தந்தை, பாட்டியை கண்கூட பார்த்து வளர்ந்ததால் என்னவோ என் ஆழ் மனதில் பதிந்து விட்டது.